أنا كلب بلدي نايم ع الرصيف في سلام
وقط شارع صايع ضايع وسط الزحام
وحمار حصاوي هربان من وجع اللجام
وكيس زبالة اترمى من الشباك والناس نيام
وأغنية أمريكاني ضد حرب فيتنام
وكتاب غلافه ملون بس من جوه كله كلام
وبندقية من غير ذخيرة لكن رافضة الاستسلام
أنا الفشل والاكتئاب وضياع كل الأحلام
وطفل على كتف أبوه منظره يجبرك على الابتسام
أنا دخان المعسل في الشتا والمشي ع الكورنيش مع المدام
وحبل الغسيل في البلكونة واقف عليه الحمام
وقميص مبهدل مبقع متشمر الأكمام
وطابور طويل قدام سفارة عايز يروح أرض الأوهام
أنا صديق البطل اللي مالوش لزمة في كل الأفلام
أنا تاكسي اسكندرية لوني أصفر ف أسود، وتذكرة الترام
أنا نكتة بايخة وخناقة تافهة على أي حاجة والسلام
